III Xornadas de Informática Xudicial e Delitos Informáticos


27 sept. 2013


A Axencia de Modernización Tecnolóxica de Galicia patrocina as "III Xornadas de Informática Xudicial e Delitos Informáticos", organizadas polo Colexio Profesional de Enxeñaría Técnica Informática de Galicia (CPETIG) e que terán lugar o próximo 25 de outubro en Santiago de Compostela.

Foi no ano 2010 cando dende a Xunta de Galicia se patrocinaban por primeira vez unhas xornadas pioneiras, nas se reunían técnicos e xuristas nun repaso aos delitos informáticos, co obxectivo de informar sobre a súa investigación e persecución e de concienciar, ademais, acerca dos avances en materia probatoria forense neste tipo de delitos.

A relación de relatores que participaron nas dúas edicións celebradas dende entón configura xa unha listaxe de relevancia nacional, con ilustres participantes coma o profesor Miguel Ángel Davara Rodríguez, primeiro catedrático europeo en Dereito Informático; dona Elvira Tejada de la Fuente, fiscal delegada en Criminalidade Informática; dona Pomba Llaneza, avogada de prestixio internacional e presidenta da AEDEL; ou don Eloy Velasco, maxistrado-xuíz da Audiencia Nacional e máximo especialista da xudicatura.

Nesta ocasión, e a pesar dos obrigados axustes orzamentarios que marca a situación económica, preséntase unha nova e ambiciosa edición. Unha vez máis contarase cun grupo de expertos que permitirán ofrecer unha visión global da temática destas xornadas dende os ámbitos da avogacía, maxistratura, fiscalía, forzas de seguridade e, como importante novidade, das novas axencias internacionais.

Este ano o tema central será a ciberseguridade e os sistemas forenses de intrusión, de especial relevancia polo seu impacto social e directamente relacionado coa temática xeral destas xornadas, pero ademais revisarase dende a perspectiva dos dereitos dos cidadáns e do traballo das entidades encargadas da persecución destes delitos. Algo que de seguro xerará un intenso debate na mesa redonda.

Por primeira vez contarase coa presenza dun órgano europeo, grazas á participación de don Manuel Álvarez Sobredo, responsable de implantación do Centro Europeo contra o Cibercrime (EC3), entidade integrada na Europol e que centraliza a loita contra o cibercrime na Unión Europea.

Nesta ocasión as xornadas estrean tamén escenario, e que mellor lugar ca a Cidade da Cultura de Galicia, convertida tamén no Centro Dixital de Proceso de Datos Galicia.

Toda a información da xornada, así coma o formulario de inscrición á mesa, está dispoñible na web http://xornadaxudicial2013.cpetig.org/

Podes consultar aquí o programa.