Dende CCOO queremos felicitar ao noso compañeiro Jorge Suárez polos resultados obtidos nas pasadas eleccións municipais ao frente da candidatura Ferrol en Común na cidade de Ferrol.


10 jun. 2015


  

Funcionario de xustiza, sindicalista de CCOO, probable alcalde de Ferrol.

Jorge Suárez Fernández (Vigo 1975),era ata escasamente un par de meses o Coordinador do Sector de Xustiza de CCOO de Galicia, funcionario xudicial con destino na Fiscalía de A Coruña, dentro duns días, pode ser o novo alcalde da cidade de Ferrol.
"O triunfo da normalidade" titúlao a Voz de Galicia "Se hai unha palabra que resume o seu perfil, é o dunha persoa normal. Os que mellor o coñecen, destacan del a súa transparencia, din que é intelixente, tímido e un tanto reservado e que gaña nas distancias curtas, destacando a súa lealdade" este é o perfil que fai a prensa do noso compañeiro Jorge (A Voz de Galicia,26 maio 2015) e que se aproxima bastante ou moito a como é Jorge, un compañeiro leal, transparente, traballador infatigable que repartía panfletos ás portas da factoría naval de Astano en Ferrol á entrada da quenda das 6 da mañá, para despois estar ás 8 no local sindical de CCOO dos xulgados de Ferrol, nos xulgados da Coruña, en Betanzos ou Carballo
, e pola tarde na sede de IU, ou con colectivos veciñais ou percorrendo nos últimos días, barrio a barrio, a cidade de Ferrol.
O seu tempo como coordinador do Sector de Xustiza, non foi extenso, pero dende logo si foi intenso. Tivo que loitar contra a prepotencia dalgún ex compañeiro que cría que CCOO era un leira privada e tiña dono e señor. Devolveu ao Sector de Xustiza, os valores das cousas feitas en común, das asembleas intensas, diversas e plurais, do respecto ao outro e da defensa con decisión do servizo público.
Defendeu no sindical, un modelo que agora está permanentemente cuestionado e atacado, loitou contra os que queren converter a sociedade nunha xungla sen dereitos laborais e sociais e entendía a negociación e a presión social da xente traballadora como medio da construción, permanencia e mellora do Estado do benestar e de dereito.
Dende o sector de xustiza queremos darlle as grazas a Jorge, por todas a súas valiosas achegas, polo seu traballo nos últimos tempos. Alegrámonos dos resultados obtidos nas pasadas eleccións municipais , pero ao mesmo tempo sentimos tristeza porque xa o botamos de menos na súa labor de delegado sindical, aínda que sempre estará aí, formando parte deste proxecto colectivo, e, felicitamos á cidade de Ferrol, que pode ser gobernada por unha candidatura de unidade popular que terá ao fronte, como alcalde , a unha persoa honesta, intelixente e sobre todo, traballador.
CCOO perde un sindicalista de primeira liña, a cidade de Ferrol gañará un bo alcalde.

Parabéns compañeiro
desexámoste toda a sorte do mundo.


Sector de Xustiza de  CCOO de Galicia.