A vicevoceira,Yolanda Díaz asegura que “non paran de roubarnos para darllo aos banqueiros e defraudadores”.
Santiago de Compostela, 20 de decembro de 2012.- O Grupo Parlamentario de Alternativa expresa a súa determinación de enfrontar tanto nas institucións como nas rúas, sempre ao carón das traballadoras e traballadores do sector público, unha loita frontal contra as pretensións da Xunta de reducirlle os soldos outro 7 por cento.
No Pleno desta semana, o deputado de Alternativa Galega de Esquerda, Xabier Ron, formulou unha pregunta parlamentaria indagando polas medidas compensatorias que o goberno da Xunta ía aplicar para aliviar ás traballadoras e traballadores do sector público aos que o PP deixou sen paga extra de decembro.
Ron asegurou que “a conselleira mentíu na súa resposta porque agochou as súas verdadeiras intencións, esa axenda oculta da guerra sucia do PP contra o emprego público, os servizos públicos e en xeral as conquistas económicas, sociais e culturais da clase traballadora; a conselleira eludíu desvelar os seus plans para zouparlle a un salario xa malferido polos sucesivos recortes de Zapatero e Rajoy”.
Desmentindo ese dircurso que fachendea de ter as contas públicas da autonomía con toda solvencia, agora pasadas as eleccións se vai atacar directamente desde a Xunta a un colectivo de traballadoras e traballadores que están a sufrir a crise sen ambaxes. En febreiro, Feijóo xa recortara as condicións laboráis dos 90.000 traballadores e traballadoras dependentes da Xunta argüindo que deste xeito evitaría rebaixarlles máis o salario. Mentía entón e segue a mentir agora. “Non paran de roubarnos para dárllelo a banqueiros, defraudadores e grandes empresarios” sinalou a vicevoceira, Yolanda Díaz, que advirte dunha imparable onda de contestación social nas vésperas da presentación do vindeiro orzamento.
O deputado, Xabier Ron, argumentou as razóns que militan tanto para recuperar a paga extra roubada canto para que cese a campaña de ataques as súas condicións laboráis, que repercuten na progresiva erosión dos servizos públicos, prexudicados pola redución de persoal e do financiamento. Unha clase traballadora abafada pola xeira de perda de salarios (rebaixa do 5 por cento, roubo da paga extra...), unha carestía da vida marcada pola suba xeralizada dos servizos públicos como a xustiza, a sanidade ou facturas descontroladas como a luz, as peaxes das autoestradas, e todo elo nun contexto de medidas procíciclicas que destrúen emprego, deprimen o consumo e afondan nunha depresión económica brutal.
Para os deputados do Grupo Parlamentario semella un escándalo que se continúe esnaquizando as condicións salariais e de traballo do sector público cando se regalan milleiros de millóns de euros a banqueiros, defraudadores e grandes empresarios, os verdadeiros amos dese goberno da mentira que é o de Feijóo.
A Conselleira de Facenda avanza o que será o orzamento: un documento envelenado de mentiras e recortes, que afondan na xeira de agresións contra o emprego público.
Publicado en www.esquerdaunida.org
Enlace permanente: pica aquí
