España será rescatada tras as eleccións galegas

Mentres Feijóo presume de salvar a Galicia do rescate, cargos do Goberno de España filtran á prensa internacional que España está a piques de pedir unha "liña de crédito". Fano por vez primeira e a catro días dos comicios do 21-0.

Portada do Financial Times sobre o rescate a España

O PP sabe que a súa marxe para gañar as eleccións galegas é limitada. Por iso o Goberno de Mariano Rajoy adiou a petición do temido rescate até despois dos comicios do 21O.

Agora, co sufraxio dentro de catro días, a prensa internacional xa dá por descontando que España solicitará a "axuda financeira". A pregunta clave é que novos recortes terán que asumir os cidadáns a cambio dos cartos para salvar as quebradas finanzas do Estado, incapaz de financiarse nos mesmos mercados que axudou a rescatar con cartos públicos.

Financial Times, a 'biblia' dos mercados en Europa, cita a unha fonte do Ministerio de Economía para dar por seguro, na súa portada, a solicitude. O mesmo funcionario desbota unha petición "inmediata" pero fala abertamente de que o Executivo está a negociar as condicións desta "liña de crédito" para que sexa o Banco Central Europeo quen comece a mercar inmediatamente débeda española, explica o Wall Street Journal.

Ninguén dá cartos a cambio de nada

O Executivo está a facer esforzos por evitar o rescate total e lograr unha liña de crédito dos fondos do novo Mecanismo Europeo de Estabilidade.

Hai algunha diferencia para os cidadáns? En principio non, pois as dúas solucións significarán que España teña que cumprir unhas condicións estritas. É dicir, controlar máis e a curto prazo o déficit público. Cunha economía en franca recesión, até o 3% o próximo ano, só hai unha maneira de lograr menos números vermellos nas contas públicas: máis recortes.

Que retivo todos estes meses a Rajoy para pedir o rescate? O presidente de España negará calquera influencia electoral. Agora ben, é un feito que a primeira vez que unha fonte oficial española filtra á prensa internacional que se estuda xa pedir o rescate chega a unha semana dos comicios.

A tarefa por diante da prensa de dereitas

Mentres, en Galicia o candidato do PPdeG sacaba peito en Vigo presumindo que a súa "austeridade" permitiou "despexar o risco dun rescate" e darlle ao país "maior credibilidade".

Alberto Nuñez Feijóo sabe que ningunha opinión pública é quen de crerse que un país é rescatado sen que se lle impoñan condicións. Unha tarefa, convencer aos españoles de que os cartos de Europa chegan sen que haxa que facer máis recortes, na que o Goberno de España e os seus aliados mediáticos botarán o resto. Farano, iso si, unha vez que galegos e vascos depositen os seus votos nas urnas este domingo.

Publicado o 17/10/2012 en www.galiciaconfidencial.com

Enlace permanente: pincha aquí