No día de onte, na EGAP, en Santiago de Compostela estaba convocada mesa sectorial de xustiza, cunha longa orde do día, demasiado para unha soa mañá, na que empregouse a vella fórmula de tempos pasados que utiliza a administración: a política dos feitos consumados tamén chamada o rodillo.
As alegacións e observacións presentadas por CCOO e o resto de organizacións sindicais foron respondidas cun “tomamos nota” e confirmando que publicaranse as diferentes ordes e instrucións considerando aquelas que consideren oportunas, sen que houbera unha interlocución ou diálogo real, sen vontaden negociadora en resumo.
Isto é consecuencia da falta dun traballo previo, da convocatoria de mesas de traballo previas ás mesas onde se poida por en común o que ten consenso e achegar posicións no que nos separa da administración co fin de chegar a un acordo que elevar a mesa sectorial, isto é a negociación real que a día de hoxe non existe.
Traxectoria profesional
Abrirase un novo grao extraordinario para aqueles que non puideron acceder nas anteriores convocatorias aos graos I e II.
Dende CCOO consideramos que deben ter fin estas convocatorias e deixarse xa un modelo ordinario e aberto, sen prazos, de forma que se poida acceder en canto se cumpran os requisitos.
Si foi aceptado ampliar o prazo de cumprimento dos méritos e requisitos a 31 de marzo de 2024, pero non variar as porcentaxes de pagamento, coa escusa de ser unha imposición de función pública, quedando as anualidades nun 20% 20% 60%, discriminatorio cos que accederon en convocatorias anteriores (60-20-20)
Calendario laboral
Por CCOO faise notar que sen un regulamento de mesa non existe negociación, preséntase un calendario como punto na orde do día recalcando que ese punto é decisorio. O calendario laboral non ten sentido mentres non se acutalice a orde de permisos e licencias, totalmente obsoleta e que a falta de negociación está a menoscabar os nosos dereitos laborais.
A administración comprometeuse a estudar dúas alegacións de CCOO: que o horario flexible se estenda dende as sete da mañá ata as oito da tarde, computando a fichaxe como tempo traballado e a eliminación da obrigatoriedade de gozar de 15 días de vacacións na tempada de verán.
Bolsa de interinos de médicos forenses
CCOO comparte a urxencia da regulación desta bolsa, pola escaseza de profesionais para atender ao servizo, e reservouse o dereito a facer alegacións no prazo ordinario, pois vai ser tratado coma unha orde, con informes xurídicos, exposición pública e prazo de alegacións.
Quendas Rexistro Civil
CCOO esixiu unha actualización das contías, xa que non se actualizan dende o ano 2013, e cando menos, demanda unha actualización co IPC dende ese ano, o que suporía un incremento do 19,7%, ao igual que subiron o resto de conceptos retributivos. “Tomamos nota” foi a resposta da administración.
Creación de prazas 2024
Coas necesidades e demandas perentorias e urxentes na administración de Xustiza, a Xunta unicamente pon enriba da mesa a creación de 8 novas prazas, unha de xestión, seis de tramitación e unha de auxilio e descarga nas OOSS a proposta de que órganos priorizar. CCOO fará unha proposta, aínda que con este número raquítico en ningún caso vai solucionar os problemas dos Xulgados de Violencia, algúns mercantís, xulgados mixtos e tantos outros que están completamente saturados por falta de medios persoais e materiais.
Modificación da RPT das fiscalías
Neste punto demandamos o cumprimento das ratios de un funcionario por fiscal, que non se cumpre en ningunha das fiscalías e que case é escandaloso en lugares como Ourense.
Tamén, polos problemas derivados en épocas vacacionais, que os coordinadores e encargados de estatística poidan facer gardas.
En rogos e preguntas instamos a unha regulación uniforme dos servizos de apoio dos decanatos, xa que foron creados para liberar a sobrecarga dos xulgados ante o incremento das videoconferencias por exhorto, e nalgunhas cidades como A Coruña non se está a cumprir debidamente este cometido. A Xunta derívanos ante os secretarios coordinadores, polo que dende CCOO ante a falta de resposta manteremos unha reunión co secretario de goberno para abordar esta problemática.
