No día de hoxe tivo lugar unha teatralización chamada mesa sectorial, co fin de dar cumprimento ao trámite legal de “oídas as organizacións sindicais”, imprescindible para que a asesoría xurídica da Xunta dea o visto bo a unha RPT, neste caso do Imelga.
CCOO considera toda elaboración
dunha Relación de Postos de Traballo un avance, de cara a construción dunha
Nova Oficina Xudicial, pero cre inútil o tempo perdido xa que non vén
acompasada da necesaria implantación de medios electrónicos, da dotación de
persoal suficiente, nin dunha retribución adecuada ás funcións desempeñadas,
incremento salarial que a lei permite a través da RPT, pero que o austericidio
de Feijoo aborta para pagar os cartelóns electorais. Achegamos cadro da RPT do
Imelga, que pretende estar publicado no prazo dun mes.
Na
posterior rolda de intervencións CCOO esixiu:
O inmediato abono a todos e todas da paga extra
substraída indebidamente en decembro de 2012, e o cese do malgasto de cartos
públicos na xudicialización da súa devolución. O Director Xeral manifestou que
“era unha decisión de goberno” optar pola xudicialización (sic)
Unha nova regulación da orde de substitucións, que
permita o pago íntegro das mesmas, como acontece no resto do Estado, e unha
adecuada regulación do sistema de quendas, que paralice as atribucións de funcións
entre o corpo de auxilio xudicial, e que, en tanto isto nos suceda sexan
retribuídas como quendas e se reforcen con funcionarios de auxilio os servizos
de apoio de Ferrol e Santiago
Unha defensa firme contra a privatización do
Rexistro Civil dende Galicia, que pasará de 315 a 5 Rexistros Civís. O director
xeral manifestou que sostén unha posición neutra, como a lexía, e que a Xunta
deberá seguir facéndose cargo dos libros en tanto non se dixitalicen ao
completo, polo que terán que ter persoal de xustiza os Rexistros Civís
A reactivación da creación de órganos xudiciais,
para subsanar o colapso da maior parte de xurisdicións, especialmente familia,
instancia e social
Insistimos na publicación no concurso de traslado
de TODAS as prazas de reforzo das fiscalías
Solicitamos que se resolva o tamén xudicializado
conflito co profesorado de galego, para volver ofertar os cursos de linguaxe
xurídica que permitan o regreso de funcionarios imposiblitados de conciliar a
vida profesional e familiar
A mellora da seguridade (paupérrima) nos edificios
xudiciais, e a instalación dun timbre de alarma nos Servizos de atención ao
cidadán
A depuración de responsabilidades pola nefasta
construción do novo edificio xudicial de Ourense, cun investimento de nada
menos que 18 millóns de euros
CCOO está convencida de que todas
e cada unha das peticións serán atendidas en breve prazo, dada a eficiencia e
vontade de diálogo da Dirección Xeral, e moito antes se algún sindicato sen
representación envía un contundente escrito á mesma para a axilización destas
reivindicacións.
CCOO si considera por amortizada
esta Dirección Xeral, que pervive a golpe de titular de prensa, pero desatendeu
nas súas retribucións e dereitos ao persoal que dela depende, menospreciando o
diálogo social e trazando un camiño mediático de modernización que non se
corresponde coa realidade que vivimos día a día nos Xulgados.
Galicia,
17 de abril de 2015
