SR. DIRECTOR DA ESCOLA GALEGA DAS ADMINISTRACIÓNS PÚBLICAS
R/ DE MADRID 2-4
15707-SANTIAGO DE COMPOSTELA.
No día de hoxe tivemos coñecemento a través dos traballadores, pois o Sector de Xustiza de CC.OO non recibiu comunicación ningunha ao respecto e tan só se molestaron en colgalo na súa páxina web, da anulación de TODOS os cursos de Teleformación de Linguaxe Xurídica destinados a traballadores da Administración de Xustiza que prestan servizos efectivos fóra da Comunidade Autónoma de Galicia, así como a maioría das convocatorias para os que están destinados na propia Comunidade.
Esta anulación, segundo o texto da propia Resolución do 13 de xuño de 2012, lévase a cabo "co obxectivo de cumpri-la normativa en materia de estabilidade orzamentaria e déficit público".
Para CC.OO a Resolución por vostede asinada vai provocar un prexuízo irreparable a todos os traballadores que están destinados fóra de Galicia, demostra un desprezo absoluto á negociación colectiva e utiliza a coartada da crise para recortar o dereito á formación aos traballadores e a obriga da administración de impartila e demostra unha falta de previsión absoluta por parte de á EGAP polos seguintes motivos:
- Moitos traballadores verán eliminadas as posibilidades de obter unha praza no próximo concurso de traslado, pois cada curso de Lingüaxe Xurídica puntúa 4 puntos, que equivalen para os efectos de concurso de traslado a 2 anos de antigüidade.
O elevado número de galegos destinado fóra da Comunidade unido ao baixo número de prazas vacantes existentes fan que estes 2 anos de antigüidade sexan esenciais para conseguir unha praza.
- O atraso na obtención dalgunha praza a través do Concurso de Traslado impedirá a Conciliación da Vida Laboral e Familiar a moitos traballadores e un grave prexuízo económico.
- Non é comprensible e moito menos xustificable que se convoquen, o que significa que están presupostados, cursos de Linguaxe Xurídico no mes de maio e un mes despois se publique unha resolución argumentado que non hai presuposto.
- Dubidamos que o aforro en cursos de formación on-line, onde o único gasto son os titores, pois non hai aulas nin material e os temarios xa están preparados do ano pasado, poida provocar un aforro brutal e imprescindible para a supervivencia da Xunta de Galicia.
Dende CC.OO consideramos a anulación destes cursos o suficientemente grave como para que vostede convocase a Mesa de Formación, legalmente constituída para informar da intención da Administración.
Solicitamos que reconsidere a súa decisión para evitar o grave prexuízo que se provocara na súa vida profesional e familiar de moitos traballadores, sobre todo se temos en conta que os cursos anulados son de teleformación e os seus custos son moi baixos fronte aos beneficios que se poderían alcanzar.
Vigo, 19 de xuño de 2012
Fdo. Pablo Valeiras Rios
Responsable do Sector de Xustiza de Galicia
